Jado Ikastetxeko DBHko 3. mailako ikasleek joan den ikasturtean burutu zuten proiektua, STEAM Feel ,Think, Do! ingelesezko izenburupean, hau da: “Sentitu, Pentsatu, Egin”. Gazteek bi eta hiru urteko umeentzako jostailu sentsorialak diseinatu zituzten, material birziklatuak eta berriro ere birziklagarriak erabiliz. "Ikasleen gaitasunak hobetzen edo gai hauetan bokazio eta nahi profesionalak pizten dituzten STEAM hezkuntza-ekimenak". nabarmendu dute zentroko arduradunek.
Jado Ikastetxeko arduradunek azpimarratu dute aitorpen horregaz berrikuntzaren alde egindako apustua berresten dutela, eta, halaber, horrek bultzada ematen diola orain arte egindako lanari. Izan ere, Hezkuntza Sailak honako helburu hauekaz sustatzen duitu sari horiek: batetik, “Euskadin garatzen ari diren eta estrategian ezarritako helburuak betetzen laguntzen ari diren STEAM hezkuntza-ekimenak identifikatu” nahi ditu, eta, bestetik, “STEAM izaera nabarmena duten proiektu berritzaileak, eta, bereziki neska, gazte eta emakumeei zuzendutakoak” bereizi gura dituzte sari hauek.
Jado ikastetxeak maiatzaren 30ean jasoko du saria. Lehiaketa honetako epaimahaia Innobasqueko, Euskal Herriko Unibertsitateko (EHU), Deustuko Unibertsitateko, Mondragon Unibertsitateko, Confebaskeko, Donostia International Physics Centerreko, Lauaxeta Ikastolako, TKnikako, berritzeguneetako eta lanbide-heziketako zentroetako ordezkariek osatu dute.
STEAM Feel, Thin, Do! proiektua
Saria irabazi duen proiektua garatzeko, Jado Ikastetxeko DBHko 3. mailako ikasleen lehen zeregina bi eta hiru urteko umeen garunak nola funtzionatzen duen jakitea izan zen, funtsezko gaia baita adin horretarako jostailu sentsorial egokia diseinatzeko. Horretarako, ikastetxean hitzaldi bat eskaini zuen espezialista baten laguntzagaz, txikienek estimulu desberdinen aurrean nola erantzuten duten ikasi zuten ikasleek, eta mugimenduetan nola eragiten dien mugaketak eta psikomotrizitate finik ez izateak. Ikaskuntza teoriko hori berresteko, ikasleek aukera izan zuten Haur Hezkuntzako gelak bisitatzeko eta haurrek egoera desberdinetan nola erantzuten zuten ikusteko.
Horregaz batera, ikasleek hainbat arlo landu zituzten, beraien helbururako behar zituzten ikasgaiak eskuratzeko: Biologia eta Geologia, Teknologia, Plastika eta Ikusizko Hezkuntza, Gizarte Zientziak, Osasun Fisikoa eta Emozionala, Euskara, Ingelesa eta Frantsesa.