Eneritz Argintxona Fraile gazte erandioztarraren familiak uztailaren 23an salatu zuen bere desagerpena, eta Bocas de Toroko Fiskaltzako Homizidio eta Femizidio Departamentuak baieztatu duenez, uztailaren 26an aurkitutako gorpua 30 urteko emakumeari dagokio. Amaren laguntzari esker, polizia zientifikoak DNA alderatu ahal izan du, aurkitutako gorpuzkiak Argintxonarenak zirela baieztatuz. Zehaztu dutenez, gazte erandioztarra buruko traumatismo baten ondorioz hil zen, beraz kasua hilketa bezala ari dira ikertzen.
Egileak aurkitzeko izapideak zabalik daude, eta arduradunek azaldu dutenez, daborduko "balizko egileen zantzuak" aurkitu dituzte. Komunikatu baten bidez jakinarazi duenez, ikerketa biktimaren gorpua aurkitu zutenean hasi zen, Carenero uhartean, inguruko bizilagunek agintariei abisua eman zietenean. Ondoren, Fiskaltzako funtzionarioak bertara joan ziren gorpua jasotzera.