Proiektuak, bost hilabeteko exekuzio epea du eta Karl Marx kalearen oinezkoentzako kale osoa barne hartuko du, ibilgailuen trafikoa ezabatuz plazagaz integratzeko. Gainera, Josu Murueta plaza birzolatuko dute, zuhaitzak eta galtzada-harriak barne hartuko dituen banda berde berri bategaz, eta izkina eta eskaileretako landare-eremuak handituko dituzte, ingurunearen gogortasuna arinduz. Egurrezko altzariak eta argiteriaren trazadura berria ere jarriko dituzte, eremua hobetzeko.
Etxegorri kalean, esku-hartzeari esker plaza zabaldu ahal izango dute eta zuhaitz eta jarleku lerro bat gehitu ahal izango dituzte. Era berean, Karl Marxekin lotzen duen eskailera birformulatuko dute, egonleku funtzionalagoa bihurtuz, diseinu zeharrargiko metalezko pergola arin bategaz, anfiteatroko agertokiagaz harmonizatzen duena.
Hobekuntza gehigarrien artean, udal-iturriek nabarmendu dute harmailak berrituko dituztela, zurezko elementuak gehituz ingurunea leuntzeko eta haren erabilera sustatzeko, landare igokariak dituzten lorezain linealak sortuko dituztela, eta plazako zein agertokiko argiztapena hobetuko dutela. Euriaren aurrean agertokiaren estaldura optimizatzeko aukerak ere baloratzen ari dira.
Herritarren parte-hartzea
Proiektuaren diseinua auzo-elkarteen, Musika Eskolaren eta "Umeen Ahotsa" haur-programaren laguntzagaz egin zutela azaldu du Udalak. Programa horri esker, umeen ideiak bildu ahal izan zituzten, plazaren erabiltzaile nagusiak diren haurren eta gazteen beharrei bereziki erantzungo zien gune bat definitzeko.
Azkenik, azpimarratu dutenez, asmo handiko diseinu horrek indartu egiten du Erandiok hiri-espazio jasangarri eta irisgarriak sortzeko duen konpromisoa, bertako biztanleen eskaeretara egokituta eta bizi-kalitatea hobetzera bideratuta.