Udal-egoitza kudeatzeaz arduratzen den Gizatzen enpresari 3.200 euro baino gehiagoko isuna jarri diote, langile batek 48 egunez jarraian nahitaezko atsedenik gabe lan egin zuela egiaztatu ondoren. El Correo komunikabideak argitaratutakoaren arabera, Bizkaiko Lan eta Gizarte Segurantzako Lurralde Ordezkaritzak baieztatu zuen kaltetua jardunean egon zela uztailaren 23tik irailaren 8ra arte, etenik gabe.
Halaber, lan-ikuskaritzak plantillako zenbait kidek txandak kateatu zituztela ere antzeman du, lanaldien arteko gutxieneko 12 orduko atsedenaldia errespetatu gabe, eta hori arau-hauste larria da indarrean dagoen lan-araudian.
Egoera EAJ eta PSEren gobernu-taldearen kudeaketaren ereduaren ondorio zuzena dela salatu du Erandioko EH Bilduk. Alderdi abertzaleak sarritan salatu ditu egoitza horretako lan-baldintzak, eta aipatu du beharginak, gehienak emakumeak, "irregulartasun errepikatuak" salatu dituztela, "beren lan-eskubideak urratzen dituztenak", nominen ordainketan atzerapenak, soldata diferentzialak eta langileen bajak ez betetzea, besteak besteak.
Egoera honen aurrean, Erandioko Udalak 2022ko azarotik Gizatzen enpresagaz duen kontratua desegitea eta erantzukizun politikoak zehaztea eskatu du EH Bilduk. "Salatutako lan-esplotazioak eta lan-baldintzek langileei eragiteaz gain, zentroan bizi diren adinekoen asistentzia-kalitatean ere eragiten dute. Adinekoen zaintzarekin ez da jolasten ", berretsi dute bozeramaileek.
