Urtero, Erandioko auzo batean Berbotsek antolatzen duen jaialdia Martiartuko landetan izango da oraingoan. Bertara joateko, Udalak autobus-zerbitzua jarriko duela iragarri du, beraz, ez da kotxean bertaratu beharrik egongo. Goizetik hasiko den egitarauan herriko hainbat taldek parte hartuko dute, hala nola Goiherri Sokatira Taldeak, Erandioko musika eskolak, herriko dantzari taldeek edo ALBEko bertsolariak. gainera, egun osoan zehar puzgarriak ere egongo dira txikitxoenen gozamenerako.
HIRUKAk zuretzako prestatu duena
Erandiotik Lemoizera, euskara hutsezko komunikabide bakarra den heinean, HIRUKA ere bertan izango da eskualdeko euskaltzaleakaz harremana sendotzeko. Hala, opari eta eskaintza bereziak izango ditugu euskaltzale guztientzako:
- Gure standera hurbiltzen diren HIRUKAlagun guztiek gure zozketan parte hartu ahalko dute. Irabazle ezberdinek hurrengo sarietako bat jaso ahalko dute: Aquarium sarrera bikoitzak, Sputnik sarrera bi, Hontza Extrem sarrera bi, Errigora kutxa bat, Peñatxuri Surf Taldeko surf klase bat bi pertsonetzako, Ibaizabal liburuak eta Karpinerako haur sarrerak.
- Gainera, HIRUKAlagun izateagatik dituzten abantailak eta deskontuak azalduko dizkiegu eta HIRUKA txartel birtualaz informatuko dugu, erakunde kideetan erabili ahal izateko txartelaz, alegia. Erakunde kideak hurrengoak dira, besteak beste: Senda Viva, General Optica, Hontza Extrem, Peñatxuri Surf..
- HIRUKAlagun berri bihurtzen diren lagunek prezio berezia izango dute Kanpomartxon: 25 eurogatik HIRUKAlagun bilaka daitezke 2025ean, ongietorri oparia jasoko dute eta aurreko puntuan azaldutako zozketaren partaide bilakatuko dira.
- Kanpomartxoko lagun guztientzako (HIRUKAlagunak direnentzako eta ez direnentzako) Etxeko tresnen jolasa prestatu dugu. Bertan parte hartuz gero, zozketa berezi batean sartuko zara.
- Gainera, Kanpomartxoko gure mahaira hasieratik hurbilduz gero, Esaera zaharren jolasean parte hartu ahalko du edonork beste pertsona bategaz: esaera zahar baten lehen edo bigarren partea emango diogu pertsona bakoitzari, hori osatzeko. Esaera zaharra osatuta ekartzen duten lehen 3 bikoteei sari bana emango diegu.