Erandioko Auzokideok Elkarteak erakunde publikoen plangintza falta salatu du eta berehalako neurriak eskatu dizkio URAri Asua ibaiaren eremuan. Elkartearen arabera, arriskua kudeatzeko egungo aurreikuspenek ez dute inolako obrarik aurreikusten arazoa arintzeko, nahiz eta horiek gero eta larriagoak izan.
Joan den martitzenean, Giltza ibaiak gainezka egin zuen eta Erandioko hainbat eremu urez bete ziren, Asua ibaia alerta maila gorrira zegoen bitartean. Deitoratu dutenez, egoera ez zen are larriagoa izan itsasbeheraren ondorioz, baina bizilagunek ohartarazi dute hurrengo marea biziakaz arriskua areagotu egingo dela.
Horregaz batera, udalerriak larrialdietarako, egokitzapenerako eta arriskuaren prebentziorako plan eguneraturik gabe jarraitzen duela salatu dute, eta horrek are larriagoa egiten duela kaltetuen ziurgabetasuna. Azkenik, behin betiko konponbideak eskatzen dituzte egoera jasangaitzaren aurrean.