Laneko Segurtasun eta Osasunaren Nazioarteko Eguna dela eta, LAB sindikatuak elkarretaratzea egin du astelehen honetan Erandioko Mutualiaren egoitzaren aurrean. Bertan, patronalak eta administrazioak laneko segurtasunagaz duten konpromiso falta salatu zuten. Mobilizazioa aldarrikapen jardunaldi baten barruan kokatzen da, non LAB, ESK, STEILAS, Hiru, EHNE-Etxalde eta CGT sindikatuek gogorarazi dute 2024an 64 pertsona hil zirela Euskal Herrian lan istripuetan eta 100.000 pertsonak baino gehiagok istripuren bat izan zutela.
LABek salatu du lan-absentismoari buruzko diskurtsoa lan-eskubideak murrizteko aitzakia gisa erabiltzen ari direla, baina beraien berbetan enpresek ezarritako baldintza prekarioek eragiten dute absentismo hori, gaixotasun eta lesio larriakaz batera. "Laneko osasuna eta segurtasuna bermatzen ez diren oinarrizko eskubideak dira", adierazi dute.
LABek neurri sendoak eskatu ditu, hala nola prebentzio-araudia betetzen ez duten enpresen aurkako zehapen eraginkorrak eta lan-ikuskaritza propioa sortzea. Erandioko kontzentrazioak agerian utzi gura izan du, halaber, mutualitateek laneko bajen kudeaketan duten zeregina, sindikatuaren arabera enpresa-onurak langile-klasearen osasunaren gainetik lehenesten dituen sistema baten konplize gisa aipatuz.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.