Udal-zerbitzuen artean, Gizarte Zerbitzuak (6,72), Garbitasuna (6,48) eta Herritarrentzako Arreta zuzena (6,42) dira ondoen baloratuenak. Hala ere, herritarren kezka nagusien artean aparkalekurik eza (% 54,7), etxebizitza duin baterako sarbide zaila edo alokairuen garestitasuna (% 9,5) eta segurtasun falta (% 9,2) agertzen dira.
Inkestak erakutsi du herritarren % 60,4 prest legokeela aparkaleku arautua ezartzeko, betiere bizilagunentzako hobari edo salbuespenakaz. Proiektu berrien artean, ondoen baloratua izan da Cables y Alambres lantegi zaharrerako aurreikusitakoa (6,85), Mendiguren plazaren estalkia (6,48) eta Astrabudua auzora metroa lotzen duen pasabidearen gaueko itxiera (6,06).
Herritarrek lorategien zaintza (6,84) eta garbitasun maila (6,25) ondo baloratu dituzte, baina hormetako pintadak (5,47) eta kutsadura (5,34) txarrago. Inkestatutakoen %83,6k udal-isunak onartuko lituzkete jarrera ez-zibilen aurrean. era berean herritarrek positibotzat nabarmendu dituzte kaleen eta espaloien hobekuntzak, aisialdi eta kultura jarduerak, berdeguneak eta oinezkoentzako guneak. Negatiboan, berriro, aparkalekurik eza.
Azkenik, Udalaren irudia "ona" dela dio herritarren %34,9k, eta %34,4k "ez ona ez txarra". Aldiz, kudeaketak 5,01 puntuko nota jaso du eta alkatearen lanak 5,03.
EH Bilduren balorazioa
Erandioko EH Bilduk azpimarratu du inkestak bi kontraste nagusi erakusten dituela: herritarrek Erandiori 7,39 puntu ematen diote bizitzeko leku gisa, baina Udalaren kudeaketa 5,01egaz eta alkatearen lana 5,03egaz baloratzen dute. Koalizioak salatu du bizi-kalitatea "auzokideen eguneroko ahaleginari esker" dela eta ez EAJren kudeaketari esker.
Arazo nagusiak sakonekoak direla diote: aparkaleku falta, etxebizitza eskuratzeko zailtasuna eta segurtasuna. Inkestak bilakaera politikoa ere neurtu du, eta EH Bilduren arabera, emaitzek erakusten dute EAJ jaitsiera nabarmenetan dagoela (% 36,3tik % 32,9ra, 8tik 7 zinegotzira), eta EH Bildu goraka doala (% 25,5etik % 30,5era, zinegotzi bat gehiago). Horrek aldaketa politikoa gero eta hurbilago kokatzen duela diote, eta Aitziber Oliban alkatearen aurrean konfiantza handiagoa jasotzen dutela.