Erandioko Udalak argitaratutako txostenak jasotzen duenez, 152 galdetegi eta 443 ekarpen jaso dituzte guztira, aurrekontuen diseinuan herritarren iritzia eta lehentasunak txertatzeko helburuagaz. Horien artean, herriguneko kaleen kalitatea eta mantentze-lanak izan dira lehentasuna jaso duten arloak. Horien atzetik, segurtasuna eta osasuna aipatu dituzte udal-politikaren ardatz garrantzitsu gisa.
Hauek izan dira hain zuzen ere, gehien errepikatu diren gaiak: eremu publikoaren garbiketa, aparkalekua eta mugikortasuna, bide-segurtasuna, aisialdia eta komunitate-bizitza, kirol-instalazioak eta ingurumenaren babesa. Gazteria eta gizarte-ekintzagaz lotutako gaiak ere nabarmendu dira herritarren kezkak eta behar sozialak adierazten dituzten esparruetan.
Udalak balorazio positiboa egin du herritarren parte-hartze mailari buruz, eta jakinarazi du jasotako ekarpenak aztertzen eta 2026ko aurrekontu-proposamenean txertatzeko bideragarritasuna baloratzen ari direla.