Herri Bideak Kate Barik, Erandio Auzokoa Herrikoi Elkartea, Sagarrak Ekologista Taldea eta Ekologistak Martxan elkarteek elkarlanean bultzatutako ikerketaren emaitzak jendaurrean aurkeztuko dituzte. Horretan, Airearen kalitatearen azterketa. PM2,5 eta deposizio atmosferikoa Erandioko (Bizkaia) hiri- eta industria-inguruneetan izenburupean, CSICeko Pirinioetako Ekologia Institutuko ikertzaileek 2024tik 2025era bitartean egindako lanaren emaitzak azalduko dituzte.
Ikerketak biriketan sartzeko gaitasun handiena duten PM2,5 partikulak eta deposizio atmosferikoa aztertu ditu, aerosol atmosferikoek uzten dituzten metalen eta bestelako konposatuen kontzentrazioa neurtuz. Emaitzek agerian utzi dutenez, sustantzia horien mailak giza osasuna babesteko eta ekosistemen oreka mantentzeko gomendatutako mugen gainetik daude.
Hala, azterlan honen ondorio nagusien artean azpimarratu dute Eusko Jaurlaritzak airearen kalitatea zaintzeko duen sistema ofiziala ez dela gai Erandioko biztanleek jasaten duten benetako esposizioa neurtzeko. CSICen datuakaz batera, 2019 eta 2021 urteen artean herritarrek egindako zientzia-neurketak ere erabili dituzte (Ibercivis plataformaren bidez), eta horiek guztiek bat egiten dute: egungo estazioek ez dute kutsaduraren argazki osoa ematen.
Aurkezpen ekitaldia: Zientzia eta Artea
Datorren hilaren 23ko saioa informazio teknikotik harago joango dela ere iragarri dute. Bilboko Burtsa eraikinean 18:30eatik aurrera egingo duten ekitaldian, aire garbiaren aldeko borrokan sortutako bestelako materialak ere erakutsiko dituzte. Tartean, herritarrak sentsibilizatzeko kanpainetako irudiak, arte-proiektuak, "Aire garbiaren aldeko eguna" ekimeneko oroigarriak, tokiko taldeen kontzertuen berri eta gaiari buruzko komiki bat izango dira ikusgai.
Antolatzaileeh euren helburua argi adierazi dute: Erandioko eta inguruko herritarrei zein erakundeei informazio zehatza ematea, osasun publikoan zuzeneko eragina duen gai honi konponbidea emateko urratsak eman ditzaten.
