Tartangako aparkalekua duela bederatzi hilabete ireki zen, auzotarrek duten aparkatzeko arazoari irtenbidea emateko. Lursailak, ordea, badu berezitasun bat: urte luzez industria-jarduera izan zuen, eta horregatik dago "kutsadura potentziala izan duten lurzoruen" zerrendan jasota.
Horixe salatu zuen EH Bilduk, balitekeela bertan egunero aparkatzen dutenentzat osasunerako arriskua egotea ohartaraziz. Alderdiak kritikatu zuen Udalak ez zuela lurzoruaren kalitateari buruzko aurretiazko azterketarik egin.
Jaurlaritzak, ordea, ontzat jo du Udalaren azalpena. Mikel Jauregi sailburuak Legebiltzarrean azaldu duenez, legeak aurreikusten dituen baldintzak betetzen dira salbuespena aplikatzeko: erabilera behin-behinekoa da (bi urte baino gutxiagokoa), ez da etxebizitzetarako, eremua zolatuta eta estalita dago, eta lurzoruari buruzko informazioa badago jada.
Funtsean, administrazioaren iritziz, ez dago txosten berria egitera behartzen duen arrazoirik. Bien bitartean, 125 plazako aparkalekua martxan dago, eta auzotarrek egunero erabiltzen dute.