Azalduko den txostena CSICeko bi ikertzailek egin dute, eta Erandion partikula finen maila altuak atzeman direla jasotzen du. Erandioko Udalak berak helarazi zion azterlana Eusko Jaurlaritzari, eduki zientifiko konplexua duelako eta, ondorioz, Jaurlaritzako teknikariek behar bezala aztertu eta interpretatu dezaten.
Bileran, txostenaren ondorioez gain, erabilitako metodologia, neurketa-protokoloak eta azterketan kontuan hartutako adierazle nagusiak ere azalduko dira. Helburua udal ordezkariek informazio zehatza jasotzea eta izan ditzaketen zalantzak zuzenean argitzeko aukera izatea da.
Ekimen hau Erandioko Udaleko Osoko Bilkurak onartutako mozio baten ondorio da. Mozioa aho batez babestu zuten EAJk, EH Bilduk eta PSEk. PPk zein Elkarrekin Podemosek ez zuten bozketan parte hartu. Alderdiek Eusko Jaurlaritzako Ingurumen eta Osasun Publikoko sailek azalpen-bilera bat egitea eskatu zuten, airearen kalitatearen neurketari eta datu-bilketari buruzko informazioa argitzeko.
Bestalde, Erandioko Udalak adierazi du prest dagoela indarrean dagoen araudiaren barruan egin daitezkeen hobekuntzak bultzatzen laguntzeko, hala erabakiz gero. «Herritarren osasuna da garrantzitsuena, eta horrek gidatzen du gure jarduna», nabarmendu du Aitziber Oliban alkateak.