Ekimenaren ardatza herritarrek Udalari zuzenean galdetzeko tresna bat da. Horretarako, eskaera-eredu sinple bat prestatu da, edozeinek Erandioko Udalari airearen kalitateari eta jarduera-protokoloei buruzko informazioa modu ofizialean eskatu ahal izateko. Sustatzaileen arabera, helburua gardentasuna handitzea eta administrazioaren erantzuna bizkortzea da, azken kutsadura-episodioen ondoren sortutako ezinegonaren aurrean.
CSICeko ikerketa tekniko batek agerian utzi du airean dauden partikula kutsagarriak osasunerako gomendatutako mailak baino handiagoak direla; horrek esan gura du epe luzera arnasketa-arazoak edo bestelako osasun-arazoak izateko arriskua handiagoa izan daitekeela. Gainera, industrialdeetan atzemandako metal astunek (nikela edo kadmioa, esaterako) arrisku gehigarria eragin dezakete, batez ere denboran zehar pilatzen badira.
Bestalde, kutsaduraren ondorioak ez dira soilik datuetan geratzen. Auzokideek sarritan salatu dituzte usain biziak eta ondoezak, eta hainbat kasutan Udaltzaingoari jakinarazi zaizkio gertakari horiek. Gainera, egoera horiek eskola-ordutegian gertatu izan dira, aire librean dauden adingabeen jarduerakaz bat eginez.
Testuinguru horretan, ekimenaren bultzatzaileek nabarmendu dute ezin dela gehiago "beste alde batera begiratu", eta herritarrei dei egin diete eskaera-eredua erabil dezaten, airearen kalitateari buruzko datu eguneratuak eta osasuna babesteko neurriak eskatzeko.
Lehen erantzunak
Aldi berean, auzokideen mobilizazioak lehen erantzun instituzionala ere eragin du. Egoera kaskarrean zegoen Altzagako dorre elektriko zaharraren inguruan, Udalak jarduketa abiatu du eta jabetzari gehienez bi hilabeteko epea eman dio egitura kentzeko. Arkitektoaren txostenak ez du berehalako kolapsoa aurreikusten, baina ohartarazi du egitura ezin izan dela osorik aztertu eta narriadura areagotu daitekeela egungo egoerak bere horretan jarraituz gero.
Oraingoz, auzokideen ustez, lehen pausoa baino ez da. Herritarren parte-hartzea funtsezkoa izango dela azpimarratzen dute, administrazioek neurri eraginkorrak har ditzaten.
