EH Bilduren ustez, erantzun hori ez da nahikoa, Eusko Jaurlaritzaren txostenak berak aitortzen duelako Erandion emisio-iturri ezberdinak daudela, tartean industria-jarduera, trafikoa eta aireportua. Hori dela eta, koalizioak uste du eztabaida ezin dela itxi araudia betetzen dela esate hutsagaz
Eusko Jaurlaritzaren txostenaren ondorioen arabera, Erandioko airearen kalitatearen zaintza "zabala" da parametroei, maiztasunari eta banaketa espazialari dagokienez, eta Euskadiko Airearen Kalitatea Kontrolatzeko Sareak indarrean dagoen araudia betetzen du. Halaber, txostenak jasotzen du PM10 eta PM2,5 partikulek, baita zenbait metalek ere, araudia betetzen dutela. CSICen azterketari dagokionez, Jaurlaritzak zalantzan jarri du erabilitako ekipamenduengatik, laginketa-baldintzengatik eta metodologia-arazoengatik balio ote duen airearen kalitatearen araudiaren mugak ebaluatzeko.
EH Bilduk, ordea, azpimarratu du eztabaidaren muina ez dela soilik lege-mugak betetzen diren ala ez, herritarrek benetan zer arnasten duten jakitea, egungo neurketek esposizio hori behar bezala islatzen duten argitzea eta urteetan kezka agertu duten auzotarren konfiantza berreskuratzea baizik.
Koalizioak gogorarazi du CSICek bitartekaritza-bide bat proposatu duela, eta proposamen hori Eusko Jaurlaritzari, Erandioko Udalari eta Arartekoari helarazi zaiela. EH Bilduren arabera, Arartekoak begi onez ikusi du aukera hori; Jaurlaritzak eta Udalak, ordea, baztertu egin dute, arazorik dagoenik ukatzen dutelako.
Horregatik, EH Bilduk gardentasuna, bitartekaritza independentea, herritarren parte-hartzea eta osasun publikorako bermeak eskatu ditu. Era berean, herritarrak animatu ditu Auzokoa Auzo Elkarteak eta Herri Bideak Kate Barik elkarteak antolatutako hitzaldian parte hartzera; bertan, CSICeko zientzialariek beren azterketa azalduko baitute.
"Zer arnasten dugun jakin nahi dugu", adierazi du EH Bilduk.