EAJk eta PSE-EEk osatutako Erandioko gobernu-taldeak akordioaren bidez denboran luzatutako egoera bat arautu gura zuen hitzarmen horren bitartez, Udalak azken 30 urteetan lursail horiek erabili baititu lagapen ofizialik gabe. Halaber, Tartangako eremuan erabilera publikoetarako lur berde berriak lortu eta Jado ikastetxearen egungo hezkuntza-erabilerak hara lekualdatzea aurreikusten zuen hitzarmenak. Horren truke, Altzagako 14. zenbakian fundazioak dituen gaur egungo lursailen planeamendua aldatzea jasotzen zen, etorkizunean egoitza bat edo eguneko zentro bat eraiki ahal izateko.
Epailearen arabera, hitzarmenak ez zuen beharrezko memoria justifikatiborik, eta dokumentu horretan aztertu behar ziren, besteak beste, akordioaren beharra eta egokitasuna, eragin ekonomikoa, jardueraren izaera ez-kontraktuala eta legeak ezarritakoa betetzen zen ala ez. Horren aurrean, Udalak defendatu du izapide eta txosten guztiak bete zirela, memoria hori ez zela nahitaezkoa eta lursailak ez zirela aurretik udalarenak, ezta desjabetuta ere, prozedurak ez zirelako amaierara iritsi.
Auzia EH Bilduk eraman zuen epaitegietara
Koalizioaren ustez, akordioa ez zen lur-salmenta soil bat, baizik eta zor zaharrak, diru publikoaren konpromisoa, errenta pribatuen mantentzea eta etorkizuneko hirigintza-arriskuak nahasten zituen operazioa. EH Bilduk argudiatu zuen lursail batzuk Udalaren esku zeudela daborduko, edo herritarrek eremu publiko gisa erabiltzen zituztela, eta ez zela behar bezala justifikatu Erandiok zer irabazten zuen hitzarmenagaz.
Udalak, berriz, proiektuaren aurkezpenean adierazi zuen Altzagako gune horri berdeguneak eta erabilera publikoko espazio berriak ematea zela asmoa, auzoa "atseginagoa eta modernoagoa" bihurtzeko. Besteak beste, kirol-eremu bat, skate park bat, bizikletentzako edo patinentzako zirkuitu bat, edota igerileku irekiak egiteko aukera aipatu zen, betiere herritarren parte-hartzerako prozesu baten bidez zehazteko. Udalbatzak erabaki beharko du orain epaia helegitea aurkeztu edo ez.