Jakinarazi dutenez, dokumentala Fronteras, Migraciones y Exilios jaialdiaren sailean hautatu dute. Antolatzaileen fitxa ofizialaren arabera, 2025ean egindako 36 minutuko lana da, eta aurtengo hautaketa ofiziala osatzen duten 164 dokumentaletako bat. Jaialdiaren XIV. edizioak 1.177 lan jaso ditu guztira, eta irailaren 4tik 12ra egingo dute Mexiko Hirian.
Historias Emigrantes dokumentalak Latinoamerikako ikasleen testigantzak, 1960ko hamarkadan Bilbora iritsitako migratzaileen bizipenak, Erandioko CEPAko kideen esperientziak eta Nishma Elkarte pro-sahararraren ahotsa uztartzen ditu. Gainera, Fatma Galia poeta sahararraren parte-hartzea ere jasotzen duela nabarmendu dute. Egileek azaldu dutenez, euren asmoa migrazioa mehatxu gisa ikusi beharren, egungo gizartearen parte den errealitate gisa aurkeztea da.
Jaialdia 2000. urtean sortu zen, dokumental sozial eta independenteei zabalkunderako espazioa eskaintzeko helburuagaz. Dokumentalaren emanaldia irailaren 12an, 12:00etan, Cineteca Nacional de las Artesen izango da. Egun garrantzitsu horretan, Errexil eta Gorordo bertan egongo dira, ikusleekaz solasean aritzeko.