Elkartearen arabera, ekimenak musika, dantza, kultura-aniztasuna eta elkartasuna batuko ditu. Horretarako, munduko hainbat tokitako kultura-adierazpenak publikoari hurbilduko dizkioten hainbat taldek parte hartuko dute; beraz, Erandioko eta Bizkaiko herritar guztiak gonbidatu dituzte parte hartzera eta "musikaz, dantzaz eta kulturarteko elkarbizitzaz" gozatzera.
Hala ere, jaialdiaren sarrera doakoa izan arren, bertan diru-kutxa solidario bat jarriko dutela jakinarazi dute, Hondurasen egoitza duen Casa Jose fundazio txikiaren alde. Fundazio horren helburu nagusia indarkeria, abusu edo abandonu egoeran dauden ume, nerabe eta familiei laguntza integrala eskaintzea da. Beraz, elkarteak diru-kutxaren elkartasun-dimentsio garrantzitsua azpimarratu du.
Honduras Etxeko presidente Janeth Valladaresek azaldu duenez: "Jaialdi hau kulturak elkarrengana hurbiltzeko, elkar ezagutzeko eta gizarte irekiago eta solidarioago bat eraikitzeko tresna izan daitekeela erakusteko ideiagaz sortu zen". Ildo horretan, hirugarren ediziora iristeak "bereziki pozten duela" adierazi du, proiektuak hazten jarraitzen duela adierazten duelako. "Erandio topagune bat izatea gura dugu, kultura guztiek euren tokia izan dezaten eta gure desberdintasunez gozatu ahal izan dezagun, baina baita batzen gaituen guztiaz ere", azaldu du.
ALASNI jaialdiaren hasiera
Elkarteak dioenez, jaialdiaren izena Tawahka herri indigenaren hizkuntzako hitz batetik dator. Alasni "poza, topaketa eta ospakizuna" adierazteko erabiltzen dute; eta hori jaialdiagaz bat doa, helburua komunitate desberdinek euren kultura-adierazpenak partekatzea eta lotura berriak sortzeko espazio bat eskaintzea izan delako.