Etxebizitzaren Euskal Behatokiaren arabera, etxebizitzen salerosketa-prezioa %22,6 igo da azken bost urteetan, eta familiek, batez beste, diru-sarreren %31,8 bideratu behar dute etxebizitza ordaintzera, Etxebizitza Legeak ezarritako mugak gaindituz.
Eskaera egin aurretik, Udalak Erandioko etxebizitza-parkearen, etxebizitza babestuaren eskariaren, etxebizitza hutsen, salerosketa- eta alokairu-prezioen eta etxebizitza turistikoen egoera aztertu zuen. Horren ostean, 2025etik etxebizitzaren prezioen igoera "familien ahalmen ekonomikoaren gainetik" joan dela ikusi zuten.
Orain, entzunaldi-epea zabalik dago, eta, alegazioak aztertu ondoren, Erandio eremu tentsionatu izendatzeko behin betiko ebazpena etorriko litzateke, hala badagokio.
Los Ochos kasuegaz lotura
Erandio eremu tentsionatu izendatzea Tartangako Los Ochos eraikinetako bizilagunen egoera alda dezake. Izan ere, Alokairu Legeak babes gehigarri bat eskainiko lieke baldintzak betetzen dituzten maizterrei; hau da, ohiko etxebizitzaren kontratuaren derrigorrezko edo isilbidezko luzapen-epea amaitzean, maizterrak urtebeteko luzapenak eskatu ahal izango lituzke, gehienez hiru urtez, eta jabeak, oro har, onartu egin beharko lituzke, legeak aurreikusitako salbuespenetan izan ezik.
Neurriak, beraz, etorkizunean iraungiko diren Los Ochos eraikinetako kontratuetako batzuei eragin liezaieke, nahiz eta urrian dagoeneko amaitutakoei ez liekeen automatikoki atzeraeraginez eragingo.