Udalaren zirriborroan lau gune aipatzen dituzte: Altzaga, Astrabudu, Lutxana eta Enekuri. Erandioko gune horietan TAOa ezartzea proposatu dute, euren artean bereizketak egin barik, 22:00ak arte, astelehenetik barikura. Gainera, eremu bakoitzean doako bi aparkalerku-eremu egongo lirateke, ibilgailuak gehienez 9 orduz uzteko. Beraz, Altzaga, Astrabudua, Lutxana eta Enekuriko kaleetan aparkalekua araututa egongo litzateke.
Adierazi dutenez, ez-egoiliarrek gehienez lau orduz aparkatu ahal izango lukete, doako eremu horietatik kanpo. TAO txartelei dagokienez, bi mota egongo lirateke: egoiliarrentzakoa, erroldatutako pertsonek eskuratu ahal izango luketena, ibilgailua kalean denbora-mugarik barik uzteko; eta baimendutakoentzakoa, erroldatuta ez dauden titular edo erabiltzaileen ibilgailuentzat.
Hala ere, abenduaren 4ra arte, herritarrek euren iradokizunak egin ahal izango dituzte. Alkateak jakinarazi duenez, ordenantza berria onartu aurretik herritarren iritzia jaso gura dute, behin betiko ezaugarriak oraindino zehaztu barik daudelako.