Azaldu dutenez, aldaketa honen arrazoia udalerriko elkarteei eta getxoztarrei zuzendutako programei edo jarduerei lehentasuna ematea da. “Diru-laguntza hauen beste helburu bat da udalerriko elkarteak eta boluntarioak bultzatzea, alor publiko eta hirugarren sektorearen arteko elkarlana, prestazio eta zerbitzuak aurrera eramateko gizarte ekimena laguntzeagaz batera. Gizarte kohesio handiagoa ere sustatu gura dugu”, nabarmendu du Elena Coria Gizarte Zerbitzuetako zinegotziak.
Aipatu laguntzak sei esparrutan banatuko dituzte: 45.000 euro udalerriko erakundeen ohiko jardueraren funtzionamendurako edota mantenurako; 15.000 euro Getxorako interesezko proiektu zehatzetarako; 30.000 euro proiektu esperimentaletarako edo berritzaileetarako; 59.650 euro parte-hartzea sustatzeko; 62.000 euro esku-hartze sozialean laguntzeko; eta 8.000 euro etorkinen harrera sustatzeko.
Laguntzak Eusko Jaurlaritzan edota Getxoko Udalean erregistratuta dauden irabazi asmorik gabeko elkarteek eskatu ahal izango dituzte. Tokiko erakundeak, gehienez, proiektuaren %75 diruz lagunduko du, eta proiektuari dagokion exekuzioa eta justifikazioa %100ekoa izan beharko da.