Algortako San Nikolas kaleko 18. zenbakiko garaje batean izandako leherketa batek sute txiki bat eragin du gaur goizean. Horren eraginez, etxea hustu behar izan dute. Bizilagunak onik atera dira eta zerbitzu medikuek ez dituzte artatu behar izan.
Getxoko Udalak jakinarazi duenez, baliteke 8:00ak aldera eroritako tximistak eragindako txinpartaren bat izatea leherketaren arrazoia. Udaltzaingoa, Ertzaintza eta Suhiltzaileak tokira bertaratu dira. Azkenengoek gas hornidura eten dute kanpotik eta berehala amatatu dituzte sugarrak. Instalazioak arakatu ostean, 8:30ean, auzokideak beren etxeetara bueltatu dira.
Naturgaseko teknikariak bertaratu dira egoera aztertzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
