Getxoko popularrek zubia zaharberritzeko lanen atzerapena salatu zuten joan den astean. Azkenaldiko euri-jasa handiek ezinegona sortu zuten Gobela ibaiaren ondoko bizilagunen artean. Ostera, horren ibilguan prestatutako urak gainezka egiteko eremuei esker, ura ez zen etxebizitzetara heldu.
Eduardo Andrade popularraren esanetan, “Fadurako zubiak gure ibaiaren puntu beltza izaten jarraitzen du”, horren altuera eskasak uraren bidea ixten duelako.
Getxoko Udalbatzak, 2012ko martxoan, eta Eusko Jaurlaritzak, 2012ko maiatzean, Fadurako zubia moldatzeko lanak berehala hasteko eskakizunak egin zizkioten URAri. Hala ere, urte bi joan ziren URA horren inguruan mintzatu arte: lanak 2015eko lehenengo hiruhilekoan hasiko zirela esan zuen; urte bukaeran hasiko dituztela jakinarazi berri dutei.
Popularrek salaketa egin eta egun gutxira, Getxoko Udalak Uraldietako Informazio Batzorde Bereziaren batzarrerako deia egin zuen, atzorako. Saio horretan, “Fadura inguruko hobekuntza hidraulikorako jarduketen proiektua” aztertu zuten. Bertan, Gobela ibaiaren egokitzapen hidraulikoaren eta ingurumen-lehengoratzearen jarduera aurreratuak jasotzen dira. Batzarrean URAren ordezkariek ere parte hartu zuten.