Gala hasteko, Ondarreta Abesbatzak ongi etorria emango die bertaratutakoei, Imanol Landa Getxoko alkateak, Joseba Ugalde Federazioko lehendakariak eta Alberto Gomez Etorkizunako presidenteak irekiera ekitaldia protagonizatu aurretik.
Ondoren, aldizkariaren sariak banatuko ditu Antonio Ortega "Pyrenaica"-ko zuzendariak. Besteak beste honako kategoriak sarituko ditu: argazkigintza, mendi-artikulua, emakumeen bloga eta aldizkariaren laguna. Ez dira sari bakarrak izango, Mendizaletasunaren Galak 2014an lan berezia egin duten kirolari, pertsona eta erakundeen ahalegina ere eskertuko baitu. Gala amaitzeko bidean, Fredi Paya bertsolari algortarrak abestuko du, eta, segidan, "Sati" film poloniarra proiektatuko dute, Poloniako Kultur Institutuari esker. Bartlomiej Swiderskik zuzendutako film laburrak Himalayako Shisha Pangma mendian hil zen Piotr Morawskiren bizitza kontatzen du. Zintak Alpinismoko Film Onenaren saria lortu zuen abenduan, Mendi Film Festival-en. "Sati" nahigabearen irudikapen gordina da, eta altitude handiko alpinismoaren ondoriorik latzenak ezagutarazten dizkigu. Alpinista poloniar oso ezagunaren esentzia pizten badu ere, "Sati"-k alargunean jartzen du arreta: haren senarraren heriotzaren osteko suntsipena; haren hausnarketak elkarregaz zuten bizitzaren gainean; haren etorkizunarekiko itxaropenak eta beldurrak.
Bukaera Berantzagi dantza taldeak emango du.