Gaur, martitzena, “Getxo parte-hartzaile baterantz” jardunaldia egingo du EH Bilduk, Getxoko herritarren parte-hartzea bultzatzeko Ordenantzaren gainean egindako proposamena aurkezteko, besteak beste. Bertan parte hartzeko gonbita zabaldu dute herriko hainbat lagun eta elkarteren artean. Horrez gainera, bi aditu gonbidatu dituzte: Axier Jaka, Donostiako Udaleko Partaidetza zinegotzia, eta Nicola Foroni, Munduan zehar hainbat partaidetza-prozesutan parte hartu duena. Saioa arratsaldeko 19:00etatik aurrera izango da, Villamonte kultur etxean. Hizlarien ponentzietan zehar galderak zein ekarpenak egiteko aukera egongo da.
Azaltzen dutenez, EH Bilduk Getxoko Udalera sartu zenetik izan duen lehentasunetariko bat herritarren parte-hartzea sustatzea izan da. Horrez gainera, parte-hartzeak hainbeste muga zituela ikusita “Udala zabaltzeko unea da” dinamika abiarazi zuten iaz.
Gonbidatuetako bat, Nicola Foroni, italiarra da sortzez, 20 urtegaz Nikaraguara bidaiatu zuen kooperante aritzeko eta lanbide-eskola batean irakasle ibili zen hasieran. Laster, ordea, El Salvadorretik iritsitako errefuxiatuakaz hasi zen lanean: proiektuen kudeaketan laguntzen zien. Gero, Nikaragua utzi eta El Salvadorrera jo zuen. Bertan, Fastras fundazioagaz hasi zen lanean, herrialdeko komunitateakaz elkarlanean gizarte-gaietan eragiteko. Gerra amaitzean, CIAZO fundazioaren zuzendari izendatu eta UNESCOgaz elkarlanean jardun zuen, bake-hezkuntzaren inguruan. Azken 15 urteetan Euskal Herria du bizileku, eta freelance 4 kontinentetan zehar ibili da eraldatzeko prozesuen bideratzaile-lanetan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
