Internet existitzen zenerako jaio zen belaunaldiari “natibo digitala” deritzo, bere ingurunea hobetzeko teknologia erabiltzen duenari, berriz, “herritar adimentsua” (Smart Citizen). Bi kontzeptu horiek batuz, Getxoko Gazte Citizen egitasmoa sortu du Getxoko Udalak, gazteek bizi diren udalerriko ingurumena, osasuna, hezkuntza edo merkataritza laguntzeko gailuak asma ditzaten, teknologia irekiagaz. Proiektuaren aurkezpena martxoaren 23an, astelehena, egingo dute Algortako gaztelekuan, 19:00etan. Interesatuek izena eman dezakete gaztebulegoa@getxo.net helbide elektronikoaren bitartez edo whatsapp bat bidalita 665 760 464 telefono zenbakira.
Aipatutako programak, erronka bat proposatzen die gazteei, hots, sentsore bat eraikitzea Udaleko Gazteria Arloak jarritako informazio-panelen aurrean geratzen diren pertsonak zenbatzen dituena eta jasotako informazioa datu-base eskuragarri batera bidaltzen duena.
Lehendabiziko ekintza horretarako, Udalak teknologia maite duten eta beren inguruneagaz konpromisoa duten gazte getxoztarrei dei egin die ekimenean parte hartzeko. Prozesuan zehar, parte-hartzaileek lankidetza-tresnakaz lan egingo dute, hau da, elkarrekiko sorreran, hardware librean (Arduino), C-ko programazioan, datu-baseetan, ultrasoinu sentsoreetan, komunikazioetan eta sare sozialetan.
Getxoko Gazte Citizen egitasmoa 14 eta 24 urte bitarteko gazteei zuzenduta dago.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.