Ertzaintzak eta Getxoko Gurutze Gorriak gazte baten hilotza aurkitu dute gaur Azkorri hondartzako haitzetan, Eusko Jaurlaritzako Segurtasun Sailak jakinarazi duenez. Ertzaintzak goizeko 10:00etan abiarazi ditu berriro joan den astelehenean desagertutako 32 urteko gaztea bilatzeko lanak, helikoptero baten laguntzagaz. Izan ere, atzo arrastian desagertutako gaztearen autoa aurkitu zuten Galean amilduta. Gaztea ez zegoen bertan, eta bakarrik zapatila bat aurkitu zuten horren barrualdean. Aipatutako gaztea astelehenetik darama desagertuta. Etxetik alde egin zuen, Zamudiora lanera joateko; baina ez zen bertaratu.
Gaur 13:20ak aldera, Azkorri hondartzan hilotza bat zegoela jakinarazi du pertsona batek. Gorputza haitz batzuen artean aurkitu dute, eta bilaketa zerbitzuak tokira bertaratu dira, hilotza uretatik ateratzeko.
Ertzaintzaren helikopteroak gorpua Galeako aparkalekura eroan du. Epaile-segizioak hilotza jaso zain daude, ondoren autopsia egin ahal izateko.
Ertzaintza hilotza identifikatzeko lanetan jarraitzen du.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!