Unai Aranzadi getxoztarrak “Jambo Amani?” (Bakea dugu?) dokumentala aurkeztuko du gaur, barikua, Bilboko Bilborock-en izango den Gizazinema jardunaldietan, 20:00etatik aurrera. Era berean, datorren eguaztenean, hilak 11, Getxoko Nuestra Señora de Europa ikastetxeko Batxilergoko lehenengo mailako ikasleei erakutsi eta azalduko die dokumentala. Hainbat errealitate eta arazo sormen artistikoaren eta ikus-entzunezkoaren bidez ezagutzera ematea da Gizazinema jardunaldien helburua. Halaber, parte hartzen duen publikoagaz solasaldia egingo dute. Arlo horretan, Aranzadik “Jambo Amani?” dokumentalari buruzko eztabaidan parte hartzeko aukera izango du. Ordu erdiko iraupeneko lanaren irudiak 2012ko iraila eta urria bitartean grabatu zituzten.
“Jambo Amani?” lanak Rotterdameko Zine Jaialdiaren R Ejects Radicals Jardunaldien publikoaren saria jaso du. Horietan, mundu osoko errealizadore independenteen pelikulak hartzen ditu. Aurtengo edizioan, 202 pelikula eta 233 film labur eta iraupen erdikoak aurkeztu dituzte.
Horixe izan da dokumentalak jaso duen hirugarren saria, Bartzelonako XI Giza Eskubideen Jaialdiaren film labur hoberenaren saria eta Houstoneko 47. Nazioarteko Zine Jaialdiaren zilarrezko “remia” jaso ondoren.
Unai Aranzadi zuzendaria eta kazetaria da, gatazkatan eta giza eskubideetan aditua. Hainbat hedabidetan lan egin ondoren, gaur egun Independent Docs produkzio-etxea zuzentzen du Suedian, eta une honetan dokumental batean lan egiten ari da, hedabideek Hondurasen duten rolari buruz. “Lau urte daramatzat herrialde horretara joaten, 2009ko Estatu kolpetik 2013ko lehenengo hauteskunde libreetara arteko jokabidea aztertzen. Tarte horretan ikusten da ondo zein den hedabideen eta demokraziaren arteko harremana, askotan oso konplexua dena eta sarritan negatiboa. Dinamika horiek Hondurasetik kanpo ia toki guztietara ere heda daitezke”, azaldu du zuzendariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun