Garbitzaileen greba Getxon

Enpresak kanpoko "eskirolak" kontratatu dituela salatu dute garbitzaileek

Getxoko garbitzaileak 10 egun daramatzate greba orokorrean.

Getxoko kale-garbitzaileek eta hondakin-biltzaileek euren webgunean salatu dutenez, Cespa eta Asaserrek osatutako Aldi Baterako Enpresa Elkarteak (ABEE) kanpoko langileak kontratatu ditu zerbitzu minimoak betetzeko. Martxoaren 9tik greban dauden langileek adierazi dutenez, berezko langileak beste toki batetik kontratatzeak “arau-hauste administratibo oso larria” da. Halaber, euren grebarako eskubidea “boikoteatzen” ari direla salatu dute.

Getxoko garbitzaileek hainbat bideo argitaratu dituzte euren webgunean Barakaldoko hainbat langile lanean ikus daitezkeenak. Gainera, zerbitzu minimoak bete beharrean, hau da, egunetan zehaztutako gaiak bildu beharrean, zabor guztia biltzen dutela ohartarazi dute. Halaber, “Ekain Loizagak kontratatutako eskirolak gure norbera babesteko ekipamendu mimetikoak” erabiltzen dituztela salatu dute grebalariek. Loizaga Ferrovial enpresako ordezkarietako bat da eta Cespa enpresa filialak Asasarregaz aurkeztutako eskaintza defendatu zuen Getxoko Udalaren Kontratazio Mahaiaren aurrean. Aurretik, Getxoko Udalaren aholkularia izan zen, EAJk izendatuta.

Langileek zabaldu dutenez, “kanpoko eskirolak erabiltzea zuzenean legez kanpokoa da honako baldintzetan: ‘Greba irauten duen bitartean, enpresariak ezin ditu grebalariak enpresarekin loturarik ez duten bestelako langileengatik aldatu’". Hori esateko Lan erlazioen inguruko martxoaren 4ko 17/1977 Errege Lege Dekretuaren 6.5 artikuluan oinarritu dira.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun