Argazkigintza, bideogintza edo kartelgintza gustuko duten lagun denei dei berezia egin die Getxoko Gure Esku Dago taldeak. Izan ere, laguntzaile-talde bat osatu gura dute antolatzen dituzten ekimenak iragartzeko kartelak, euren jarduerari buruzko bideoak edo ekitaldietako argazkiak egin ditzaketen pertsonekin. Aipatu jarduerak gustuko dituzten eta laguntzeko prest dauden lagun guztiak eurekaz harremanetan jartzera deitu dituzte, “konbentzituta baikaude asko zaretela jarduera horretan ere lagundu ahal diguzuenak”.
“Horietakoa bazara, leku bat duzu Gure Esku Dago Getxon. Ez dizugu eskatzen bileretan-eta parte hartzea (nahiz eta horretara ere gonbidatzen zaitugun), baizik eta jarduera horietako bat egin behar dugunean, guri laguntzea”, adierazi dute aipatutako ekimenetik.
Hautestontzi erraldoiak
Beste alde batetik, aurtengo ekimenen artean, hautestontzi erraldoiak oihalez jantziko dituzte ekainaren 21ean Euskal Herriko hiriburuetako futbol-zelaietan, tartean San Mamesen, Bilbon. Hala, herri bakoitzean jostun kopuru bat lortzea izango da helburua. Horretarako tutore-kopuru zehatza izendatu dute herri bakoitzean, eta horietako bakoitzak 20 lagun batu beharko ditu oihal-zatia osatzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.