Zapatu honetan, hilak 28, Naturaren aldeko Mundu Fondoak (WWF) klima-aldaketaren aurka bultzatzen duen “Planetaren Ordua” izango da. Getxoko Udalak, beste urte batez, bat egin du ekintza horregaz. Ekimen horren bitartez, mila milioi pertsona baino gehiagoren parte hartzea lortu nahi dute, munduko 7.000 hiri mobilizatzeagaz batera, klima-aldaketaren kontrako ekintzari babesa erakuste aldera. Horretarako, parte hartzen duten hiriek haien monumentu ezagunenak argirik gabe utziko dituzte, ordu betez.
Aipatutako kanpaina hainbat erakunde eta giza talderi zuzenduta dago, hala nola udalak, herritarrak, ikastetxeak, elkarteak eta enpresak. WWF-koen arabera, orain arte ingurumenaren alde ekiteko “sekula antolatu den deialdi zabalena” da.
Getxoko Udalak ekimenean parte hartzeko konpromisoa hartu du, eta eraikin berezien argiak amatatuko ditu, hala nola Andres Isasi Musika Eskolan, Areeta eta Arrigunaga hondartzetan, Evaristo Txurruka kaiko jolas-gunean eta Portu Zaharreko zabalgunean, 20:30etik 21:30era, zapatuan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.