Martxoaren 9an abiatutako grebari amaiera eman diote gaur Getxoko kale-garbitzaileek eta hondakin-biltzaileek. Erabakia goizean goiz, 06:00etan, hartu dute langileek, batzarrean. Goizaldean, Cespa eta Asaserrek osatutako aldi baterako enpresa elkarteko (ABEE) kideek eta enpresa-batzordekoek aurreakordioa lortu dute, eta hori berretsi dute gerora langileek (beharginen %90k eman du aldeko botoa). Hala, zaborrak biltzeko eta garbitzeko zerbitzua normala da 07:00etatik. Aurreikuspenen arabera, martitzenerako erabat garbi egongo dira kaleak.
Imanol Landa alkatea pozik agertu da enpresak eta sindikatuek lorturiko akordioarekin. Haren bernetan, greba amaituta, herriko kaleak normaltasunera itzuliko dira eta "osasun eta segurtasun arriskuei amaiera jarriko zaie".
Sindikatuek eta enpresak lortutako akordioaren arabera, langile kopuruari eutsiko diete eta lanpostu hutsen %50 beteko da. 2013-2014 urteen soldaten inguruan ere adostasun batera heldu dira bi aldeak: aurten soldata izoztuko diete baina datozen bi urteetakoei KPIren %85 gehituko diete.
Edukiontziak erreta
Ez zirudien gatazkak irtenbide erraza izango zuenik. Atzo, herritarren osasuna edo segurtasuna arriskuan dagoen guneetan zaborra biltzeko agindu zuen Eusko Jaurlaritzak. Eta goizaldean hainbat zabor pila eta edukiontziak erre zituzten ezezagunek, batez ere Areeta eta Itzubaltzeta / Romo inguruan.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
