Guzti horrez gainera, politika “sozialago” baten alde lan egingo dutela agindu zuten. Hori horrela, gehien irabazten dutenek gehiago ordain dezatela proposatu zuten: “IBI bezalako zergetan hobariak ezartzearen aldeko apustuari eutsiko diogu, eta horiek eramango ditugu Getxo Kirolak edo Musika Eskolako tasetara, eta ez seme-alaben kopuruaren arabera, errentaren arabera baizik”.
Udalerriko aberastasun materiala eta immateriala defendatuko dutela ere zin egin zuten. Horregaz batera, Getxon etxebizitzen falta dagoela azaldu zuten; hala, alokairuzko etxebizitza sozialen aldeko apustua egin zuten, “basatiki eraikitzen hasi gabe”.
Unanue: “EAJren garapen ereduak ustelkeria errazten du”
Josu Unanuek, bere aldetik, EAJren kontra jo zuen: “azken hamabi urteetan Bizkaiko zorra hirukoiztu egin da, EAJren garapen ereduaren ondorioz. ‘Hazi arazi’ da aukeratu duten lema eta hazi arazi dutena guztion zorra izan da, alderdiko lagun diren enpresari eraikitzaile gutxi batzuen patrikak ere hazi arazi dituzten bitartean”. Gauzak horrela, jeltzaleen eredua salatu zuen. Unanueren arabera, EAJrena kontu publikoak “arpilatzeko” eredua da, “guztionak diren baliabideak xahutzeko eredua”.
Horren aurrean, Bizkaiko ahaldun nagusi izateko hautagaiak EH Bilduk ekonomia “errealaren” aldeko apustu garbia duela azaldu zuen. Hori horrela, “eskualdeetan tokian tokiko errealitatean errotutako ehun produktiboa bultzatzeko neurriak” hartuko dituztela agindu zuen.