Egizu Getxo Euskaldun elkartekoek Berbodromoa egingo dute ekainaren 4an, eguenagaz, euskara kalera ateratzeko. Aurtengoa, ekimenaren laugarren edizioa izango da, eta Algortako Telletxe plazan (euria eginez gero, San Nikolas Plazako frontoian) egingo dute. Horren bitartez, gure hizkuntza kaleratzeaz gainera, euskararen erabilera indartu eta indar-erakustaldia egitea gura dute, bertaratutako jendea euskaraz berbetan ipiniz. Antolatzaileek diotenez, "euskara ikasten ari dena, euskaraz hitz egitera animatzea; euskaraz jakin arren euskaraz aritzeko aukera gutxi dituenari, aukera horiek ematea; eta nahiz eta euskalduna izan, ohituraz, euskaraz gutxi egiten duenari, motibazioa areagotzea" dute helburu.
Hala, hilaren 4an, plazan aulkiak jarriko dituzte, eta taldeka banatuko dituzte bertaratutako lagun guztiak; bost lagun egongo dira talde bakoitzean. Modu horretan, euskara dakien jendeagaz elkartuko dute euskara ikasten ari den jendea. Berriketan egingo dute lasai; kafea, eskuan. Ordubeteko tartean, interes orokorreko hiru gai jorratuko dituzte: "Zein famatu gonbidatuko zenuke afaltzera?", "Loteria tokatuz gero, zer egingo zenuke?" eta "Etxebizitza erosi ala alokatu?". Gai bakoitza jorratzeko 15 minutu izango dituzte, eta gai batetik besterako tartean, parte-hartzaileak mahai batetik beste batera joango dira, berbalagunak aldatu ahal izateko.
Goizean, txanda bi egingo dituzte: 9:00etan eta 11:00etan; eta arrastian beste bi: 17:00etan eta 19:00etan. Hamaiketakoak eta meriendak banatuko dituzte saio batetik besterako ordubeteko tarteetan. 400 pertsona baino gehiago elkartzea gura dituzte, antolatzaileek aitortu dutenez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.