Emakumeen futbolik onena asteburuan ikusgai izango da Faduran

Erabiltzailearen aurpegia Hiruka 2015eko ekainaren 4a

Bizkerreko aurtengo talde nagusia. © BIZKERRE

Emakume futbolaririk onenek jokatuko dute zapatuan eta domekan, Faduran, Emakumezkoen Getxoko IX. Futbol Txapelketan: Bizkerre, Valentzia, Bartzelona eta Athleticek. Egun horietan, izango da Roberto Tamayoren omenezko Emaku­mezkoen Getxoko Futbol Txapel­ketaren bederatzigarren edizioa, Al­gortako Fadura futbol zelaian. Bizkerre futbol-taldeak antolatzen du proba klasiko hori, eta kartel erakargarria osatu du. Izan ere, etxeko Bizkerreko jokalariez gainera, bertan jokatuko dute Espainiako Ligaren Lehen Mailako lehenengo hiru postuetako taldeetako futbolariek, emozioz beteriko norgehiagoketan. Fadurako zelaian, euren teknika erakutsiko dute Athleticek, Valentziak eta Bartzelonak. Valentzian jokatzen du Beristain getxoztarrak. Bestalde, Bartzelona lautan izan da Ligako txapelduna.

Gonbidatuak, ligaxkan

Azken edi­zioetako formatu bera izango du Getxoko futbol-txapelketak: ekainaren 6an, zapatua, gonbidatutako Lehenengo Mailako hiru taldeek ekingo diote lehiari. Ligaxka jokatuko dute, 45 minutuko aldietan, Bizkerreko kideek baieztatu dutenez. Denen arteko norgehiagoken ostean, lehenengo eta bigarren sailkatuko diren hamaikakoak pasako dira domekan egingo den finalera.

Doako sarrera

Hirugarren sailkatutakoak Bizkerreren aurka neurtuko ditu bere indarrak, finalaren aurretik jokatuko den deman. Fadurako belar naturaleko futbol-zelaian jarraitu ahal izango dira partida denak. Gainera, antolatzaileek ira­garri dutenez, sarrera doakoa izango da. Beren-beregi emakumezko futbolzaleak gonbidatu dituzte Bizkerre Futbol Taldeak, hitzordu berezi horretara hurbil daitezen.

Emakumezkoen Getxoko IX. Futbol Txapelketaren egitaraua

Ekainak 6, zapatua

  • 17:45 Athletic-Valentzia.
  • 18:45 Bartzelona-Athletic.
  • 19:45 Valentzia-Bartzelona.

Ekainak 7, domeka

  • 09:45 Bizkerre-3. sailkatua.
  • 12:15 Txapelketaren finala.

Kirolak Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun