Algortako San Nikolas plaza "euskaldun bihurtuko dute" zapatu honetan. Horretarako, Algortako kuadrilla euskaldunak bertaratuko dira 17:00etan, eta fanfarrea lagun jai-giroa "berotuko" dute. Halaber, hainbat jolas egingo dituzte, Xabi Payak bideratuta. "Jolasek hizkuntzaren erabileragaz izango dute zerikusiren bat, umoreagaz eta sormenagaz, eta ez indarragaz, kirolagaz edo gustu txarreko bromakaz", azaldu du Paul Benito del Valle Azebarriko kideak. Horrez gainera, inguruko tabernen laguntza ere izango dute.
Euskaraz bizitzeko "arnasguneen" beharra asetzeko sortu zuten Azebarri kultur elkartea. 2013an ekin zioten osatze-prozesuari, eta ordutik hona hainbat jarduera egin dituzte, berbarako: hitzaldiak eta topaketak. Hurrengo jarduera bihar, zapatuagaz, egingo dute, Azebarri egunagaz. Euren burua aurkezteaz gainera, "euskara plazara" aterako dutela azaldu dute antolatzaileek, arrastiko 17:00etatik aurrera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun