Pirritx, Porrotx eta Marimotots pailazo ezagunek "Txo, Mikmak txikia" ikuskizuna eskainiko dute ekainaren 11n, eguena, Algortako Bihotz Alai plazan. Getxoko Kultur Etxeak saio bi antolatu ditu: bata 17:00etan eta bestea 19:00etan. Daborduko salgai daude sarrerak 5 euroan, Algortako kultur etxean eta Kutxabank-en sarearen bidez.
Itsasoa plastikozko zabortegi erraldoi bilakatzen gabiltzala, Pirritx, Porrotx eta Marimotots pailazoak mundua eraldatzeko lanari ekingo diote, horretarako Mikmak txikia eta bere aitona Roke bidelagun hartuta. Hala, istorio berri honetan, euskal herritarren arbasoenganaino atzerako bidaia proposatzen dute Pirritx, Porrotx eta Marimototsek; eta Albaola Itsas Faktoriak berebiziko garrantzia izango du. Donostia 2016 hiriburutzaren baitan eraikitzen dabiltzan San Joan baleontziaren gainean abiatuko baitute bidaia. Azaroan aurkeztu zuten ikuskizuna eta 19 abesti dakartzan diskoa, hamaika lagunek idatzi eta kantatuta.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.