Probak 13.300 metro izango ditu, aurrekoetan legez. Algortako Portu Zaharretik irtengo dira kirolzaleak, arrastiko 04:00etan. Bertatik Ereagaraino igeri egin beharko dute, 300 bat metro. Antolatzaileek ohartarazi dutenez, "gutxi irudi dezake, baina itsasoa ez da igerileku bat; hari beti errespetuz begiratu behar diozu: aurretik entrenatzea gomendatzen dugu". Ereagan, berriz, 11 kilometroz pedalei eragiteko momentua izango da: Neguriko gasolindegia, Aiboa, Fadura, Kurtzes eta Azkorri atzean utzi, eta gaztetxera heldu beharko dute atletek. Azken kilometro biak korrika egingo dituzte, Benta eta Aixerrota pasa, eta gaztetxera bueltatu. "Energiak berreskuratzeko luncha» eta «kirola kuadrillan egiteko aukeraz" gozatu izana izango dira sariak: "triatloiak oso garestiak dira; parte hartzeko ere dirutza ordaindu beharra dago. Guk aisialdi herrikoia sustatu gura dugu", diote antolatzaileek.
Izen-ematea sastrakagaztetxea@hotmail.com posta elektronikoaren bidez egin daiteke.