1949an Oñatin jaioa, eta legelaria ikasketaz eta ofizioz, German Kortabarriak ibilbide luzea egin du sindikatuko arduretan, 1975ean ELAren babes juridikorako lehen bulegoaren kargu egin zenetik. Urtetan zerbitzu juridikoan jardun ondoren, 1988tik aurrera Batzorde Eragileko kide izan zen, Formazio eta Komunikazio arduretan eta, 2004ik 2007ra, idazkari nagusiaren alboko gisa. 2007an sindikatuko kargu denak utzi zituen.
Kortabarriak ELA sindikatuaren ibilbideari buruz idatzi duen saiakeraren aurrerapenak horrela dio: "Ezustekoa eman du azken urteetako ELAk: sindikatu neurritsuaren jokabide oldarkorrak, erakunde estatutu-zalearen indarreko markoaren ukoak, edota solaskidetza instituzionaletik kontraboterearen lubakietara egindako jauziak harritu egin ditu ELA ondo ezagutzen zutela uste zutenak ere. Itxuraldaketa hori gidatu duen logika azaltzen digu ELAren ibilbidea barrutik bizi izan duen German Kortabarriak. ELAren barne-prozesuaz gain, tarte zabala hartzen dute liburuan beste gai askok, hala nola LABekiko harremanak, gobernu eta alderdiekin izandako gorabeherek, ETAren esku-hartzeen eraginak, Gernikako ekitaldiak, Lizarra-Garazik, Loiolako prozesuak eta Ibarretxe planak. Kontuak 'ahalik eta zintzoen' jasotzen saiatu dela dio egileak, 'datuen makuluetan bermatuz memoriaren zalantza eta amarruak'. ELAren ibilbidearen eta, zeharka bada ere, une politiko garrantzitsuen lekukotasuna duzu, bada, liburu hau".