Ekainaren 21ean San Mames betetzera deitu du Getxoko Gure Esku Dago taldeak

Erabiltzailearen aurpegia Hiruka 2015eko ekainaren 13a

Iaz 150.000 pertsonek lotu zuten Durango eta Iruñea elkar harturik.

"Ezberdinen arteko borondateak ehuntzea izan da" Getxoko Gure Esku Dago taldeak azken hilabeteetan landu duen ekimena, herri-ekimeneko partaideen arabera. Helburua Getxoko "gizartearen aniztasuna biltzea izan da, eta aniztasun hori erabakitzeko borondatearen inguruan harilkatu eta jostea". Horretarako, hamaika koloreko 200 oihal prestatu eta osatu ditu, non marrazki, bertso edo kanta zati eta esaldien bidez adierazita banan-banan josi dituzten 4.000 getxoztar horien amets, desio eta borondateak. Ekainaren 21ean, berriz, goizeko 12:00etan, Uribe Kostan jositako oihalekaz lotuko dituzte Getxoko oihalak Zubizuri eta Bilboko udaletxeko zubiaren artean, Uribitarten, eta Bizkaian ehunduriko oihal denakaz Euskalduna zubitik Areatzako zubira, itsasadarraren ertze bietan, luze.

Arrastian, bestalde, San Mamesek hartuko ditu Bizkaiko oihal denak eta bat egingo du Baionan, Donostian, Gasteizen eta Iruñean egingo diren ekitaldiakaz 17:30etatik 19:30etara. Ekitaldi horietan "erabakitzeko eskubidearen aldeko euskal herritarren borondatea agerraraziko dute hautetsontzi bat sinbolizatuz", Getxoko Gure Esku dago taldeak zabaldu duenez.

San Mames Barrirako txartelak

Getxoko Gure Esku Dagok salgai ipini ditu laguntza bonu batzuk, kanpainaren gastuei aurre egiteko eta ezinbestekoak direnak San Mamesen sartzeko. Txartel horiek honako lekuetan eskura daitezke: Telletxeko GEDen lokalean, Kantxa Kirol Modan (Torrene, 4) eta Taberna Berrin (Sarrikobaso, 4) edo www.gureeskudago.eus orrian. Sarrera edo laguntza bonu hauen prezioa 10 eurokoa da (5 euro 14 urtetik beherakoentzat eta dohainik 2 urtetik beherakoentzat). Sarrerak erosteko azken eguna hilaren 16a izango da (hortik aurrera Gure Esku Dago ekimenak Bilbon duen lokalean -Buenos Aires kalea 13-, sarean edo San Mameseko txarteldegietan -hilaren 19, 20 eta 21ean- erosi ahal izango da). Sarrerak zenbakidunak dira.

Politika Getxo
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun