Udalerriko hogei yoga-zentro inguruk topaketak antolatu dituzte yoga interesatzen zaien pertsonentzat, Yogaren Nazioarteko Eguna ospatzeko. Hilaren 19an, 20an eta 21ean izango dira topaketak. Urtero, ekainaren 21ean ospatzen da egun hori; aurten, gainera, NBEk ofizial egin du eguna. Formatu ezberdineko hogeita hamar jardueragaz osatu dute programa: saio praktikoak, berbaldiak, musika eta antzerkia, besteak beste.
Jardunaldiak bihar, barikuan, hasiko dira. Fadurako ekitaldien aretoan, 19:30ean, Ramayana antzezlana eskainiko du Sanatana Dharma eskolak. Hurrengo egunean, zapatuan, 08:00etan, yoga-saio bat egingo dute. Ondoren, 21:30era arte, lau aretotan aldi berean, formatu ezberdineko eta diziplinaren alderdi oso desberdinak jorratuko dituzte 25 proposamenek; besteak beste, honako gaien inguruko tailerrak eta hitzaldiak eskainiko dituzte: yoga eta osasuna, espiritualtasuna, meditazioa eta luzaketak. Horrez gainera, 20:00etan, Sarva taldeak mantren kontzertua eskainiko du ekitaldien aretoan. Azkenik, ekainaren 21ean, domeka, 10:30ean, Areetako Xake plazan, yoga-saioa eta dantza egingo dute, jardunaldiei amaiera emateko. Barikuko antzezlana kenduta (5 euro ordaindu beharra dago), gainontzeko jarduera guztiak doakoak eta libreak izango dira.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.