"Zer egingo zenuke gaur Guardia Zibilaren kuartelak hartzen duen espazioan?"; horixe da Algortatik Hanka taldeak herritarrei proposatutako galdera. Euskal Herrian, eta, zehazki, Algortan "indar polizial errepresiboak» kanporatzeko mugimendu irekiak «eztabaida piztea» gura du, «jendea motibatzeko eta konturatzeko benetan ez dugula Guardia Zibila behar". Hala, Guardia Zibilak Euskal Herritik eta Algortatik alde eginez gero, kuartela okupatzen duen espazioan zer egin gura duten galdegin diete azken hilabeteotan udalerriko auzokideei eta eragileei. Jasotako ideia guztietatik, lau aukeratu dituzte, eta horietatik zein egin beharko litzatekeen aukeratzeko herri-bozketa egingo dute hilaren 20an, zapatuan, goizeko 11:00etatik arrastiko 08:00etara, San Nikolas plazan.
Herri-bozketan aukeratzeko dauden lau proposamenak honakoak dira: herri-antzokia eta kioskodun plaza; herriko frontoi publikoa; gazteentzako etxebizitza sozialak; eta Uribe Kostako memoriaren museoa. Proposamenak ezagutarazteko hainbat bide erabili dituzte Algortatik Hankako kideek, berbarako: sare sozialak eta herriko plazetan jarritako panela.
Proposamen bakoitza "justifikatuta" dago: zergatik egin beharko litzatekeen, eta proiektuaren ezaugarriak zehaztuta daude. Galdeketaren egunean, goizeko 10:00etan diana pasatuko dute Algortan zehar, "herria esnatzeko eta bozketaren berri emateko", jakinarazi dutenez.
Ondoren, 11:00etan hautetsontziak zabaldu, eta arrastiko 08:00ak arte hurbildu ahal izango da norberak gustukoen duen proposamenaren alde bozkatzeko. Bitartean, 12:00ak aldera umeentzako tailerrak egingo dituzte, eta kontzerturen bat ere egongo da, arrastiko 06:00etan.
Galdeketaren helburua "Guardia Zibilaren kuartelaren presentziak suposatzen duen egoera anormala azaleraztea" dela diote; era berean, dinamika zabaldu eta «kuartelaren kontrako borroka dinamikak eta esparruak» eskaini nahi dituzte.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.