Arenasek gaur 19:00etan jokatuko du SD Logroñesen kontra, Logroñoko Las Gaunas zelaian. Bigarren B mailara igotzeko azken faseko joaneko partida horretan emaitza ona ateratzeko asmoz zelairatuko dira gorri-beltzak. Izan ere, eguaztenean eta eguenean Lezamako kirol instalazioetan entrenatzen egon dira, Almendralejora Extremaduraren kontra jokatzera joan aurretik egin zuten legez. Arenasek ederto baliatu zuen ariketa pasa den astean, ondo baino hobeto moldatu baitziren Almendralejon: 1-4ko emaitza izan zuten Extremaduraren aurka. Gainera, Jon Perez "!Bolo"-ren mutilek zaleen babesa izango dute, klubak antolatutako autobus bietan bidaiatuko direnak. Guztiek espero dute Arenas 35 urte geroago Bigarren B Mailara bueltatzea.
Sociedad Deportiva Logroñes (ez nahasi Union Deportiva Logroñes taldeagaz), hirugarren tokian sailkatu da 3. Mailako XVI. multzoan, 92 puntugaz. Logroñoko taldeak gol gehiago egin duen bigarrena da, 105 gol sartuta. Bere golegile nagusia Ruben Peña aurrelaria da, 29 golez. Era berean, Manuel Candelas erdilariak 15 eta Iñigo Rodriguez aurrelariak 13 gol egin dituzte, hurrenez hurren.
Getxo
Ohorezko Mailako txapeldunordeen play-offa irabazi du Getxok, eta Hirugarren Mailara igotzea dagokio. Halere, itxaron beharko du lekua duen jakiteko. Izan ere, Portugalete, Arenas edo Gernika Bigarren B Mailara igotzea behar izango dute hori-beltzek.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.