Logroñon jokatutako joaneko partidaren lehenengo zatian, Arenasek kontrolatu zuen jokoa. SD Logroñeseko jokalariak Arenasen ateraino heltzeko kapazak izan baziren ere, Txemi Talledo atezainak ez zuen zertaz kezkatzerik izan. Gainera, 35. minutuan, epaileek Iñigo errioxarra kanporatu zuten Urangari egindako faltagatik, txartel gorria aterata. Ordutik aurrera indartu egin zen getxoztarren nagusitasuna. Las Gaunas futbol zelaian sartutako gol bakarra Arenaseko Javi Lopez aurrelari kordobarrarena izan zen, bigarren aldiko 15. minutuan. Golaren ondoren SD Logroñes taldea erreakzionatzen saiatu zen eta hainbat aukera sortu zuen, baina behin eta berriro egin zuten topo Txemi atezainagaz, egundoko geldiketak egin zituena. Arenas taldeak ere gol abagune gehiago izan zuen, aldea haunditzeko, tartean Yarturen biak, baina ez zuen gauzatzea lortu.
Igoera errematatzea baino ez zaio falta Arenasi
Arenas futbol taldea Bigarren B mailatik 90 minutura dago, eta abantaila daroa. Sociedad Deportiva Logroñes taldearen aurka lortutako garaipenak (0-1) lasaitasun dosia emango dio, Gobelan igoera play-offa errematatzeko. Halere, getxoztarrek ezin izango dute lozorroan gelditu, jakin baitakite zer den azken partidan promozioa galtzea. Izan ere, hirugarren aldia da igoera deman jarduten dutela. Hortaz, Arenasek zaleen sostengua behar izango du zapatuan bueltako partidan. Gobelan jokatuko da, 18:00etan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun