Getxo Kirolak udal erakundeak 360 kirol-ikastaro eskainiko ditu datorren denboraldian. Nobedade gida, denboraldi berrian zumba eskolak ere emango dituzte. Horietaz, 5.580 getxoztarrek gozatu ahal izango dute, garaiz inskribatuz gero. Izan ere, izena emateko epea daborduko ireki du kirol-erakundeak. Denboraldia urrian hasiko da, eta eskariak irailaren 14ra arte aurkeztu daitezke Fadura eta Gobela kiroldegietako bulegoetan. Horrez gainera, Getxo Kirolak-en web-gunean ere eman daiteke izena, nortasun-agiri elektronikoa edo pasahitza erabiliz; pasahitza ez daukatenek bulegoan eskatu beharko dute eta balioko du, aurrerantzean, kiroldegira joan gabe ikastaroetan izena emateko.
Irailaren 15ean, goizeko 10:00etan, zozketa publikoa egingo dute Faduran, eta lekuak modu automatikoan esleituko dira; kontuan hartu beharra dago eskariak amaitu arte, pertsona bakoitzak ikastaro bakar batean eman dezakeela izena. Behin betiko izen-emateen berri Getxo Kirolak-en iragarki-oholetan eta web-gunean emango da. Gainera, izena emateko orrian posta elektronikoaren helbidea jartzen dutenei haien eskariaren baieztapena bidaliko zaie.
Guztira 5.580 leku daude; horietatik, 2.450 izango dira aurreko denboraldian ikaskuntza-zikloko ikastaroetan parte hartu dutenentzat, eta gainerakoak jende berriarentzat. Jarduera-programari dagokionez, 25 modalitate eta ia 360 ikastaro eskainiko dira.
Getxo Kirolak-ek badauzka prest ikastaroen programa osoaren liburuxkak Fadura eta Gobela kiroldegietako bulegoetan. Gainera, informazio hori guztia eguneratuta dago eta kontsulta daiteke erakundeko web-gunean.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.