Hamar egun barru, abuztuaren 1ean, zapatua, Getxoko V. Igerialdia izango da, Arrigunaga eta Ereaga hondartzen artean, Getxo Igeriketa Waterpolo klubak antolatuta. Parte hartzaile helduak 17:00etan aterako dira Arrigunagatik eta 2.700 metroko distantzia bete ondoren Ereagara heldu beharko dute. Aurretik, 16:30ean, 300 metroko Igerialdi Txikia izango da eta irteera eta helmuga Ereagako hondartzan izango dira. Hurrengo hiru kategoria izango dira: Etorkizun handikoa (Igerialdi txikia), absolutua eta beteranoa. Maila bakoitzeko lehenengo hirurentzat sariak egongo dira.
Edizio honetan aldaketak egingo ditu antolakuntzak, datan zein ibilbidean, antolatze eta segurtasun arazo batzuk prebenitzeko. Halere, klubak azken urteotan izan den partaidetzaren etengabeko igoera mantentzea espero du. Horrela izanez gero, 400 bat partaide izango lirateke aurten. Izen-ematea datorren martitzenera arte, uztailaren 28ra arte, egin daiteke Getxoiw.com webgunearen bitartez. Helbide horretan igerialdiari buruzko ezaugarriak eta baldintzak daude ikusgai. Proba hori Getxo Kirolak erakundearen eta Bizkaiko Igeriketa Federazioaren laguntza dauka, eta, besteak beste, Kantxa Kirol Modaren eta Euskaltelen babesa.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.