Getxoko Udalak 95.000 euroko kreditua onartu du Itzubaltzeta/Romoko Errekaganeko pabiloien berritze-proiekturako. Horren alde agertu dira EAJ, EH Bildu, GUK eta PSE-EE. PPk neurri horren kontra bozkatu du eta Ciudadanoseko zinegotzia abstenitu egin da. Udal iturriek azaltzen dutenez, PP eta Ciudadanos ez ezik, talde politiko guztiak agertu dira pabiloi horien berritzearen alde, “gazteen eta bere erabilpenerako aurkeztuko diren kolektiboen jarduera errazteko”. Gobernu Taldeak gogoratu duenez, bere egunean adostu ziren hurrengo konpromisoak: pabiloi horiek berreskuratzea, lurzoru horiek desjabetzea eta auzoaren esku jartzea, Itzubaltzeta/Romon horrelakoen eskaera zabala dagoelako. Egitura hori erabiltzen zuen gazte mugimenduagaz adostu zituen Udalak konpromisoak. Horiekaz hitzarmen bat sinatu zuen Ezekiel Agirre kaleko etxetxo batera joateko berritutako eraikinera itzuli ahal izan arte.
Popularrek pabiloiak lurrera botatzeko eta ondoan dagoen Arenas Club lorategiaren jarraipena egiteko nahia agertu du berriro. Era berean, pabiloiak berritzearen eta lehen zeuden gazteak itzultzearen kontra agertu dira, “auzoan ez dituztelako nahi”. Halaber, Ezekiel Agirre kaleko etxebizitzan egotea ere ez dute ulertzen, “beste talde eta kolektibo batzuek okupatu ahal izango luketelako”. Gobernu Taldeak azpimarratu duenez, “pabiloien erabilpena, behin berritu ondoren, ez da okupatzen zuten gazteentzat bakarrik izango, baizik eta irekia izango da, beste kolektibo batzuentzat ere. Ordutegiak, erabilpenak... arautzeko hitzarmena dago, inguruko auzokideakaz bizikidetza eta errespetua bermatzeko”.
Jose Luis Landa PSE-EEko bozeramaleak gogoratu du pabiloiak mantentzeko erabakia gehiengoz adostu zela Uholdeen Batzorde Berezian.
Bestalde, GUK kolektiboen autogestioaren alde agertu da eta beste auzo batzuetan eredu hori hartzera animatu du. EH Bilduk ere gogoratu du pabiloiak ez direla gaztetxeko gazteen erabilpen bakarrerako izango, eta horiek eta Udalaren artean lortutako akordioaren antzekoak begi onez ikusi ditu, “irtenarazteak ekiditen dituztelako. Autogestionatutako lokalek ez dute bizi bere unerik hoberena eta mota honetako akordioak behar dituzte”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
