Getxoko Udaltzaingoak hiru lagun atxilotu ditu asteburu honetan bide segurtasunaren aurkako delituak egotzita, ustez baimendutako alkohol-tasa gainditzeagatik. Lehendabiziko atxiloketa zapatuan izan zen, hilaren 25ean, 02:15ean, Itzubaltzeta/Romon. Polizia iturrien arabera, musika oso altuagaz zihoan ibilgailu bat geldiarazi zuten eta gidariari musikaren bolumena jaitsi behar zuela agindu ziotenean, alkoholaren eraginpean zegoela antzeman zuten. Hala, proba egin eta 0,79 mg/l eman zuen, baimendutakoaren hirukoitza. Hartara, 39 urteko gizona atxilo eraman zuten.
Beste atxiloketa biak Getxoko Andra Mari auzoan izan ziren, Aixerrotako Nazioarteko Paella Lehiaketa egin zen lekuaren inguruetan. Zapatuan ere, 23:00ak aldera, ziklomotor batek auto baten kontra jo zuen. Inguruetan zeuden udaltzainak tokira bertaratu ziren eta ziklomotorraren 51 urteko gidariak 0,54 mg/l tasa eman zuen alkohola detektatzeko proban. Horrenbestez, bide segurtasunaren aurkako delitua egotzita atxilo eraman zuten.
Atzo, hilaren 26an, 31 urteko beste gizonezko bat atxilotu zuten goizeko 7:20ean, alkohola detektatzeko proban 1,00 mg/l emateagatik. Udaltzaingoko bi agenteek gidari horren ibilgailua saihesteko maniobra bat egin behar izan zuten Galeako itsasargiko errepidean gidatzen zebiltzatela. Izan ere, polizia iturrien arabera, ibilgailua aurkako noranzkoan eta abiadura handian zihoan.
Kasu guztietan, ikerketako polizia-diligentziak edin dira eta Getxoko Guardiako Epaitegiari bidaliko zaizkio.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
