Begihandi elkarteak antolatuta, irailaren 3tik urriaren 4ra egingo dute Getxophoto argazkilaritza-jaialdiaren bederatzigarren edizioa. Daborduko, jardueratako batzuen berri ematen hasi da Getxophoto, bere webgunean. Ikastaroei dagokienez, irailaren 1etik 5era, Jan Hoek argazkilari holandarragaz Delikatik (Araba) Getxorainoko ibilbidea egiteko aukera edukiko dute interesa daukatenek: Nerbioi ibaiaren ondotik lehenago, eta Ibaizabal albotik gero. Izen-ematea 395 euroan egongo da uztailaren 31ra arte, eta 440 euroan, abuztuaren 1etik aurrera. Salneurriaren barruan egongo dira ostatua eta gosaria.
Daniel Mayrit argazkilari madrildarrak, ostera, irailaren 4an emango du 8 orduko ikastaroa (70 euro). Besteak beste, bidaia-kazetaritzaren oinarriak ezagutzeko ibilbide laburra egingo du Mayritek, eta ondoren, argazkilariek eskura dauzkaten irudikapen-teknika berrietan sakonduko du, Getxophoto jaialditik adierazi dutenez.
Azkenik, "Itxialdia" deritzon ekitaldia irailaren 5ean izango da, 10:00etatik 18:30era. Fadurako erretegi zaharrean ipiniko dute argazkilaritzagaz lotutako gaiak eztabaidatzeko gunea. Izen-ematea 35 euroan egongo da.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.