Getxoko Udaltzaingoak trafiko dispositibo berezia jarriko du martxan gaur eta bihar, Punta Galea txirrindularitza elkarteak biharko, barikurako, antolatutako Getxoko 70. Zirkuitua dela eta. Hala, gaur 08:00etatik aurrera, Helmuga irudikatuko duen zubia muntatzen hasi dira Foruen kalean, Justizia Jauregiaren parean. Udaltzaingoen patruila batek erregulatuko du trafikoa, lanek irauten duten bitartean, Arkotxa kalearekiko bidegurutzean Martikoena kalera desbideratuz ibilgailuak. Era berean, autoek ezin izango dute Foruen kalean aparkatu. Halaber, udaltzainek zintakaz seinaleztatuko dituzte hainbat kale, lasterketaren egunean aparkatzea saihesteko: Telletxe kalea, Jaime Morera kalearekiko bidegurutzetik BM supermerkaturaino; Gobelaurren, Santa Eugenia kalearekiko bidegurutzean (Galicia tabernaren inguruak) eta Ereagako jaitsiera.
Uztailak 31
06:00etan zirkulaziorako itxita egongo da Arriluzeko Moilan, baimendutako ibilgailuendako izan ezik. 08:00etatik aurrera, ibilgailuen trafikoa galarazita egongo da Alango kalean, Foruen kalea eta Martikoena artean, antolakuntzako eta talde parte-hartzaileen ibilgailuek galtzada erdian aparka dezaten. 09:00etatik aurrera, lasterketaren norabidean bakarrik baimenduko zaie pasatzen ibilgailuei. Iturgitxi estratan, behin-behinekoz aldatuko dira hainbat seinaleztapen.
Villamonte plazaren eta Bolue kalearen arteko zatia ere trafikorako itxita egongo da. Bolue kaletik Algortara ere ezin izango da igo. Ibilgailuak Arene kaletik desbideratuko dituzte, Makaleta etorbideranzko bide alternatibo gisa. Etorbide horretan, bidegorriaren kontra dagoen erreia erabili ahal izango da trafikoa aparkalekura eta estratara desbideratzeko.
Txirrindulari lasterketa 09:30ean hasiko da. 13:30 aldera, lasterketa amaitzea espero den orduan, Foruen kalerako sarbidea itxita egongo da Helmugako atea guztiz desmuntatu arte.
Zirkuituak eragina izango duen kaleak eta autobusaren ibilbidearen aldaketak: www.puntagalea.com
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
