"Haragi kolorea?" da Getxophotok haurrentzat eta nagusientzat antolatutako Ikusi Makusi egunean egongo den tailerraren izena. Ekimena zapatuan, irailak 19, izango da Algortako Zabala ikastetxean, 11:30etik 13:30era. Horregaz, Getxophotok, Udalak kultura arteko bizikidetza sustatzeko eta arrazakeria prebenitzeko antolatutako Zurrumurruen kontrako Estrategiaren baloreakaz bat egiten du. Ekimena Angelica Dass espainiar-brasildarrak zuzenduko du. Bera da "Humanae" proiektuaren egilea, ikastaro honen abiapuntu izan dena.
Doako tailerrak arrazakaz lotutako koloreei buruzko hausnarketa proposatuko die haurrei: zuria, beltza, gorria eta horia. Parte-hartzaile bakoitzaren "benetako" kolorea topatzeko jolasa luzatuko zaie eta "haragi koloreko" margoa zalantzan jarriko da, udal arduradunek azaldu dutenez. Parte-hartzaileek azalaren kolorearen inguruan hausnarketa egingo dute, bere garrantziaren eta aldakortasunaren inguruan, baita bere edertasunaren inguruan ere, batez ere kolektiboki konposatu eta batzen denean. Haur denek euren kolorea sortu ahal izango dute eta honegaz beren erretratua marraztu.
Gutxi gora behera, 6 eta 12 urte arteko haurrentzat da ekimena. Helduen laguntza eduki dezakete. Tokiak mugatuak izango dira.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.